መቃብሬ ላይ 'ሚጣፍ
ጥብቅ ማሳሰቢያ ሸክላን ለምትሰሩ
እዚህ መቃብር ላይ አፈር አትዝገኑ
ሲነድ ሲቃጠል ሲጨስ በመኖሩ
ሲቃጠል ለሚኖር ....................
ለጀበና መስሪያ አይሆንም አፈሩ ::
/ኑረዲን ዒሣ/
መሞዘቅ
የምሽት ጨረቃ
ባር ባር በሚል ጣቱኣ
ገርፋ ስትሞዝቀኝ
እኔም የማላውቀው
እሱም የሚናፍቀኝ
የሆነ ሩቅ ሀገር
አለ ሚናፍቀኝ ::
/ኑረዲንኢሣ/
ሐዘን
ሐዘን የጎበኘው
ደጋግሞ ደጋግሞ ....
መደሰት አይችልም :
ማዘንም አይችልም :
ከመከራ ጋራ ...........
እጅግ ወዝ ተጣግቦ ::
/ኑረዲን ዒሣ / (ለሀገሬ ሕዝብ )
እኔ ጉልት ስውል ጉልት ይውላሉ
እኔ አሣ ሳሰግር አሣ ያሰግራሉ
እኔ ፍራሽ ሳድስ ፍራሽ ያድሳሉ
ብቻ አመድ ብሸጥም አመድ ይሸጣሉ
ይሄ ሁሉ ሆኖም
ምቅኞች አይደሉም
ሀበሾች ምቅኞች ብላችሁ አትበሉ
እኔ ዛፍ ስተክል መቼ ዛፍ ተከሉ
/ ኑረዲን ኢሣ /
No comments:
Post a Comment