ያልተዘመረለት ሁለገብ ባለሙያ ንጉሱ ጌታቸው ... !!!

 

ፀሀፊ ተውኔት ፣ ተዋናይ ፣ ዳይሬክተር እና አዘጋጅ እንዲሁም መምህር ነው፡፡ በገበና ቁ.1 ላይ የቅባቱን ገፀ ባህሪ ወክሎ ተጭውቷል(ደላላ ሆኖ ማለት ነው)፡፡ ሙዚቃዊ ተውኔትን በማዘጋጀትም ይታወቃል፡፡ በርከት ያሉ የመድረክ ተውኔቶች ፣ ልዩ ልዩ ፊልሞች እና የቴሌቭዥን ድራማዋች ላይ ሰርቷል ፤ አርቲስት ንጉሱ ጌታቸው።

እምቅ ምኞት ፣ ጥምዝ ፣ የተቋጠረ ደም ፣ ክፍተት ፣ የሺ እምባ ፣ ክታብ ፣ ግርዘት ፣ የነፃነት ድምፅ ፣ ግርዶች ፣ የቡሎ ጫካ ንጉስ እና ስደት የመሳሰሉ ታሪካዊ ፣ ትውፊታዊ እና ሙዚቃዊ ተውኔቶችን ደርሷል ፤ አዘጋጅቷልም፡፡

በፊልሞችም:- የጀግና ምድር ፣ ኤስ - 26 ፣ ሰንሰለት ፣ የታፈነ ፍቅር ፣ ግማሽ ሰው ፣ ይሉኝታ ፣ በመንገዴ ላይ ፣ ህያብ ፣ የፀሀይ መውጫ ልጆች ፣ ለጉድ የፈጠረሽ ፣ አነቃሽኝ ፣ ሴት አርበኛ እና ዮናታን የመሳስሉት ላይ በድርሰት ፣ በትወና እና ዳይሬክቲንግ ተሳትፏል፡፡

ገመና ቁጥር 1 (ቅባቱ - ደላላ) ፣ ለወደዱት ምዕርፍ 1 ላይ የኢንጅርነት ገፀ ባህሪን ወክሎ ተጫውቷል:: ለወደዱት ምዕራፍ 3 እና ችሎት እንዲሁም የአድዋ ትግል የተሰኙ ተከታታይ የቴሌቭዥን ድራማዎችንም ድርሷል፡፡

በመምህርነት ደግሞ ወክማ ፣ ክርኤቲቭ እና አ.አ ዩኒቭርስቲ ያገለገለ ሲሆን እነ ዳይሬክተር ሄኖክ አየለ ፣ ተዋናይ ሚሊዮን ብርሃኔ ፣ ተዋናይት ሳሚያ እና ሌሎች ታዋቂ / ተወዳጅ/ የኪነ ጥበብ ሰዎችን አፍርቷል፡፡

 

ወደ ሙዚቃዊ ተውኔት የሚያደላው አርቲስት ንጉሱ ጌታቸው ታሪክ አዋቂ እና ተጨዋች ነው፡፡ የእነ ሌሬት ፀጋዬ ገ/ መድህን እና ተስፋዬ ገብሬ አድናቂ ሲሆን በስነ ፅሁፍ ስራው ላይ የእነሱ ተፅዕኖ እንዳደረበትም ይናገራል፡፡ በቀጣይ ለእይታ የሚቀርቡ በርካታ የመድረክ ተውኔቶች እጁ ላይ እንዳለም ጠቆም አድርጎኛል፡፡

በአጠቃላይ በሬዲዮ እንግዳ ዝግጅታችን ከሁለገቡ ባለሙያ ንጉሱ ጌታቸው ጋር ጥሩ ቆይታ ነበረን፡፡ የአሜን እና የያፌት አባት ለነበረን ጊዜ እጅ ነስቻለሁ፡፡ እድሜን ከጤና : ስራን ከስኬት ጋር ተመኝቻለሁ... ፡፡

አንጋፋው የስፖርት ጋዜጠኛ እና ሁለገቡ የጥበብ ሰው ኢብራሂም ሀጂ ዓሊ አረፉ፡፡

ጋዜጠኛና አርቲስት ኢብራሂም ሀጂ ዓሊ ከ2012 ዓ.ም ክረምት ጀምሮ ታመው የሕክምና እርዳታ ሲደረግላቸው ቆይቶ ከዚህ ዓለም በሞት ተለይተዋል፡፡

ጋዜጠኛና አርቲስት ኢብራሂም ሀጂ ዓሊ ለአፋን ኦሮሞ ቋንቋ እድገት ከፍተኛ አስተዋጽኦ አበርክተዋል፡፡ ተወልደው ባደጉበት በድሬዳዋ ሙዚቃን እንደጀመሩም ይወሳላቸዋል፡፡ በ1967/68 የአፍረን ቀሎ ባንድ 2ኛ ትውልድ በመባል በሚጠራው የአዱ ቢራ ባንድ መስራቾች ከሚባሉት የክብር ዶክተር አርቲስት አሊ ቢራ፣ ሂሜ የሱፍ፣ አብዱ ሸኩር፣ መሀመድ ጠዊል ጋር በመሆን የባንዱ መስራችም ነበሩ፡፡ በአፍረን ቀሎ ባንድ ውስጥ  ሲያቀርቧቸው በነበሩት የሙዚቃ ስራዎቻቸው የሚታወቁ ሲሆን፣ አራት የሙዚቃ መሳሪያዎችን መጫወት እንደሚችሉም ይነገርላቸዋል፡፡ የዘፈን ግጥም እና ዜማም ይደርሱ ነበር፡፡ የድሬዳዋ ጨርቃ ጨርቅ እግር ኳስ ተጫዋችም እንደነበሩ አንዳንድ መረጃዎች ይጠቁማሉ፡፡

ጋዜጠኛ እና አርቲስት ኢብራሂም ሀጂ ዓሊ የበሪሳ ጋዜጣ ላይ በጋዜጠኝነት አገልግለዋል፡፡ ከዚያም በ197ዐቹ ውስጥ በኢትዮጵያ ሬዲዮ የኦሮምኛ ክፍል የስፖርት ዝግጅትን በየሣምንቱ እየተመላለሱ ከተስፋዬ ቱጂ ጋር የነፃ አገልግሎትም ሰጥተዋል፡፡ ከ1987 ዓ.ም.ጀምሮ ሙሉ ለሙሉ ወደ ሬዲዮ ጋዜጠኝነት በመግባት በሬድዮ ፋና ውስጥ በፕሮግራም አዘጋጅነትና በኤዲተርነት ያገለገሉ ሲሆን፣ በተለይ በፋና አፋን ኦሮሞ ፕሮግራም አዘጋጅነት አድናቆትን ያተረፉ አንጋፋ ጋዜጠኛ ነበሩ፡፡

በአፋን ኦሮሞና በአማርኛ ቋንቋ የስፖርት ክፍል አስተባበሪና አዘጋጅ በመሆንም አገልግለዋል፡፡ ከመደበኛ ሥራቸው ውጭ ኢትዮጵያ ዓለም አቀፍ ሻምፒዮናዎችን ስታዘጋጅ የሕዝብ ግንኙነት አባል በመሆን በየዝግጅቶቹ የመጽሔት አዘጋጅ በመሆን ሰርተዋል፡፡

በሀገር አቀፍ ሻምፒዮናዎች ላይም ጉልህ አስተዋጽኦ አበርክተዋል፡፡ በአትሌቲክስ ፌደሬሽን፣ በኢትዮጵያ እግር ኳስና በባድሜንተን ፌደሬሽንም የሕዝብ ግንኙነት አባል በመሆን ነፃ አገልግሎት ሰጥተዋል፡፡ በፋና ሬዲዮ የስፖርት የቀጥታ ሥርጭት ውይይት በማካሄድ እና የዘፈን ግምገማም ከተባባሪዎቹ ጋር ሰርተዋል፡፡ በፊንፊኔ FM ሬዲዮ የእንግሊዝ ኘሪሚዬር ሊግን በቀጥታ ሥርጭት በኮሜንታተርነት አገልግሎት ሰጥተዋል፡፡

ባለፈው ዓመት “የዓለም አቀፍ ሬዲዮ ቀንን” ምክንያት በማድረግ የኢትዮጵያ ብሮድካስቲንግ ኮርፖሬሽን ከኢትዮጵያ ብሮድካስት ባለስልጣን፣ ከዩኔስኮና ከሌሎች የሚመለከታቸው አካላት ጋር በመተባበር በአገር አቀፍ ደረጃ ባከበረበት ወቅትም በጋዜጠኝነት ዘርፍ ላበረከቱት የረጅም ዘመን አገልግሎትም “እድሜ ያልገደበው ጋዜጠኛ” በማለት የእውቅና የምስክር ወረቀትና የወርቅ ሃብል ሽልማት ተበርክቶላቸዋል፡፡

ለጋዜጠኛና አርቲስት ኢብራሂም ሀጂ ዓሊ እረፍተ ነፍስን ፤ ለቤተሰቦቻቸው ፣ ለወዳጅ ዘመዶቻቸው እና ለአድናቂዎቻቸው ደግሞ መፅናናትን እንመኛለን።